مجموعه قصائد لرحيل الشيخ جابر"رحمه الله"

ملقوفه مطفوقه · 12-07-2007, 10:28 AM

السلام عليكم,,,

بحط جم قصيدة عن بابا جابر امير القلوب الله يرحمه :(

.
.
.
.

ياعلم رفرف ترا مامات جابر

.......... حي بارواح ٍ تضمه في جسدها

ياعلم صيته علي روس المنابر

.......... من عرف سيرة ابو مبارك حمدها

رِفعت الاقلام وارتفعت محابر

.......... حي ذكره لوتوسط في لحدها

ياعلم وش انت عن هالشيخ خابر

......... سولفه للي خفا علومك نشدها

جابر العثرات للعثرات جابر

......... وقفته تِعرف ولايحصي عددها

رمز عزتنا وحنّا به انكابر

......... مانست هالارض لِه سجده سجدها

مدّته للطيب ماتِشبر بشابر

......... انشد كفوف تغذّت من رغدها

الارامل واليتيم وكل عابر

......... والعجوز اللي تنكّرها ولدها

والفقير اللي علي اللوعات صابر

......... وكل منهو يشتكي ضيقة نكدها

والبلاد اللي عليها العوز ثابر

......... والشعوب اللي تشكيّ من لهدها

ويوم ضاق الشعب في كل المعابر

.......... مد كفين العطا وكل ٍ شهدها

وراح يركض من ورا داره يثابر

......... لين رد الدار واوفي في وعدها

والكويت بعهد جابر بنت اكابر

......... شامخه والمجد تلعب بّه بيدها

مجدها لاِمع ماتعشق مجد غابر

.......... سطّر التاريخ باسطورة بلدها

ياالاهي رحمتك للشيخ جابر

........ ياوسيع المغفره بِيدك مددها

ياعظيم الشان عفوك في المقابر

........ يوم ضمت جابر الخير بلحدها

.
.
.

للشاعر

صالح مصلح الحربي

.
.

كل راحل نفقـده .. الا جابـر ال صبـاح
من رحل جابر غدينـا كلنـا أرواحٍ فقيـده
أمحق علومٍ لفتنا وباغتتنـا فـي الصبـاح
بالدشوش وبالرسايل وأعلنوهـا بالجريـده
قالوا بأن الشيخ جابر ..جاه يومه وإستراح
وقتها عليت صوتي ..رحمة الله في عبيده
ما يرده شق جيب ومـا يـرده هالصيـاح
والمشاعر كل أبوها أصبحت فينـا بليـده
يالكويت ويا الكويت .. ما يفيد إبنا النيـاح
ولا يفيد دموع شايب .. يمسح الدمعه بإيده
جرحنا في موت جابر يعتلي كـل الجـراح
يندمي قلب ٍِ تداوى وصارت جروحه جديده
ياعيون الحزن إبكي وأدمعـي بالارتيـاح
كل شخص ٍِ للمقابر وجهته هـذي وكيـده
الحزن زايد علينا .. مابعد حزنـي يـزاح
الفهد والشيخ زايد حزنهـم باقـي نعيـده
من حدادٍِ في حداد وحزننا يبنـي صـراح
وكل حزن وكل كلٍِ.. مابقـى شـيٍِ اجيـده
اشهد انك يالكويتي .. فاقدٍ ذيب ال صبـاح
المميز بالفعايل .. راعـي علـوم ٍِ فريـده
بالنيابه عن وطنّا ننعي ونعـزّي مـا راح
يرحمة رب العباد ويسكنـه جنـه مديـده

وسلامتكم

للشاعر / جارالله الشدي

راح شيخ ٍ مايمـد إلا الجزيـل
حي ذكره فوق الأرض وتحتها
جابر العثرات يالسيف الصقيل
مابقت دمعـات لـك مابحتهـا
ماعرفتك كود بالخلـق النبيـل
والصعاب ان جيتهـا طوحتهـا
جعلك بجنات خلـد وسلسبيـل
عد أسمـاء بالدعـاء سبحتهـا
نحسبك من حسبة الوزن الثقيل
كفتك عنـد العـرب رجحتهـا
نفتخر بك صدق يالقرم الدليـل
الكويـت بطيبتـك وشحتـهـا
جابر الأحمد ترى مالك مثيـل
كـم دروب ٍ جيتهـا سمحتهـا
شيخ مامثلك خبرت إلى قليـل
شيخنا وشيـوخ دار ٍ رحتهـا
نبكيك مثل الفهد صبـح ٍ وليـل
ومثل زايـد دمعتـي سيحتهـا
والله انه مابقى بالحيـل حيـل
الأرامـل بالوفـى نوحتـهـا
العزا ذكر المواقف والجميـل
في صفى التاريخ يبقى نحتهـا
رحت ياللي ماتمد إلا الجزيـل
حي ذكرك فوق الأرض وتحتها

وينك ياجابر ياساكن دسمان
ياابونا العود يانبع الحنان
غبت فجاة في غفلة من الزمان
وخلفت لنا الدموع والاحزان
تسال عنك الشوارع والفرجان
والبر والبحر و فيلكا ومسكان
حتى سور الكويت وقصر بيان
لا تظن ننساك اعوذ بالله من الشيطان
اه لو عندي خاتم سليمان
لا طلبته يرجعك وشوفك لو ثوان
وابوسك على راسك واودعك قبل الدفان
غريبة بني ادم هاالانسان
مايعرف قيمة حبايبه الا بعد فوات الاوان
والله لا ازور قبرك حتى لو بشهر نيسان
وابخر وارش ماء الورد واقرا لك القران
وادعي لك بالرحمة والغفران
ان يسكنك الفردوس لاعلى الجنان

وسلامتكم

الله يعين العقل ويثبت الدين
فى حزن لا منسى ولا هو بعابر

بصدورنا كنه طعون السكاكين
ولعيوننا مثل الكفن والمقابر

حنا حزنا للشيوخ البعيدين
وشلون ما نحزن على الشيخ جابر؟

يااكبر غلا تدمع علشانه العين
يا اعز من ناحت عليه المنابر

يا متعب بعطفك شموخ السلاطين
ويا مثبت بسهدك سمو المخابر

يامن خلقه الله وطن للمساكين
يا اصدق قصيدن سيلته المحابر

رحت وتركت محبتك عندنا دين
علمتنا معنى فراق الاكابر

ياسيدى نلقى مثل طيبتك وين؟
وانت الذى تكبر وغيرك يكابر

ان غاب جابرنا ..يجى جابر منين؟
وحنا ملاهيفك مثل ماانت خابر

حنا يبكينا فراق البعيدين
وشلون ما نبكى على موت جابر؟؟

وسلامتكم,,,,,,

رحم الله ابونا جابر واسكنه فسيح جناته

_ اللهم امين يارب العالمين

قالوا رثيته قلـت وشلـون ابرثيـه
بالدمـع وإلا فـي حـروف الكتابـه
ماشـوف تعبيـرٍ بلاغـي يكفـيّـه
اكبـر مـن الدنيـا مساحـة غيابـه
يدر فكـري واكتـب البيـت وألغيـه
مافيه بيـت القلـب يجبـر صوابـه
فعلاً وجدت الفكـر شحّـت معانيـه
وحجم الحدث ماكنت حاسب حسابـه
تشوف بين الشخص والشخص تشبيه
بالوجه..ميـر افعالهـم مـا تشابـه
والشيخ جابر عندنـا مـن يساويـه
خلاّ المواطن والوطـن لـه مهابـه
يوم الوطن حل الخطر في ضواحيـه
بالليـل واستولـت عليـه العصابـه
من طيـب فعله..واستقامـه مباديـه
فـي كـل دوله..رغبتـه مستجابـه
في حكمته..في حنكته..في مساعيـه
اقنـع قيـادات الـدول بالحـرابـه
وصفّق له العالم وهـو رافـع ايديـه
تصفيق حامـي يـوم يلغـي خطابـه
وعـوّد وقـادات الجحافـل تباريـه
وتحقـق التحريـر والنصـر جابـه
وعلى الصعيد الداخلي مـن يجاريـه
للشعـب غيـثٍ ماتوقّـف سحـابـه
شيخٍ حكم بالعدل والشعـب مرضيـه
يفصّلـون اثيابهـم مــن ثيـابـه
الشعب في حسبة بنيه وبنـي خيـه
حتى الذي مـا هـو قرابـه قرابـه
داخل وخـارج مـا تعـدد حسانيـه
عنها عسى ربـي يضاعـف ثوابـه
يالله بالفـردوس الاعلـى تجـازيـه
مع الرسول المصطفـى والصحابـه

وشكراا

هذي جم قصيده جمعتها لكم وانشالله تعجبكم,,

وشكراا

تحيااتي ملقوفه مطفوقه

!ButterFly! · 12-07-2007, 12:23 PM

allh yr7ma w'3med roo7 aljana
Thanx 3lla almo'9oo3

ملقوفه مطفوقه · 12-08-2007, 11:11 AM

ميغسي عالمرور النايس,,,
الله يرحمه :/

q8-tennis · 12-08-2007, 05:27 PM

الله يرحمه واغمد روحه الفردوس الاعلى انشاء الله
ثانكس ملقوفووفه المطفووقة على القصايد الحلوةة

N9oOoR · 12-08-2007, 06:34 PM

تسلم ايدج ملقوووفه
والله يرحم ابونا جابر
ويسكنه فسيح جناته

وصح السان شعارنا

ملقوفه مطفوقه · 12-13-2007, 03:41 PM

ميغسي عالمرور النايس

الله يرحمه :(

مـ س ـك · 12-29-2007, 08:38 PM

يعطيج العافيه ملقوفه
والله يرحمه انشالله

albakry · 12-29-2007, 08:49 PM

الله يرحم الشيخ جابر وكل ما قيل قليل في حقه

تسلم هالايادي

ملقوفه مطفوقه · 01-02-2008, 12:13 PM

اي والله..لو الواحد يتكلم من اليوم لي
باجر ما يوفيه حقه..الله يرحمه

ميغسي عالمرور النايس

فراشة الكويت · 05-14-2008, 02:03 PM

الله يرحمه ويغمد روحه الينه قولوا امين
بابا جابر مامت بابا جابر سكن بقلوبنا شباب وبنات
بابا جابر عامر وباني النهضات

ملقوفه مطفوقه
مشكوره اختي

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري